ඉහළ කොත්මලේ ජල විදුලි බලාගාර ව්යාපෘතියේ සමස්ත ජනන ධාරිතාව වන මෙගාවොට් 150 ක ධාරිතාව 30 වැනි දා සිට ජාතික විදුලිබල පද්ධතියට එක් කිරීමට ලංකා විදුලිබල මණ්ඩලය කටයුතු කරයි.
මෙම ව්යාපෘතිය මෙගාවොට් 75 බැගින් වූ ජනන බලාගාර දෙකකින් සමන්විත වන අතර පළමු අදියර යටතේ එහි එක් බලාගාරයක විදුලිය ජාතික විදුලිබල පද්ධතියට එක්කිරීම පසුගිය මාර්තු 28 වැනි දා සිදු කෙරිණි.
දෙවැනි අදියර යටතේ මෙගාවොට් 75 ක ජනන ධාරිතාවක් 30 වැනි දා පෙරවරුවේ 9.00 ට යෙදුනු සුබ මෙහොතින් ජාතික විදුලිබල පද්ධතියට එක් කළ බව විදුලිබල හා බලශක්ති අමාත්යාංශය පවසයි.
ඉහළ කොත්මලේ ජල විදුලි ව්යාපෘතිය සඳහා ජපන් රජයේ විදේශ සංවර්ධන සහන යටතේ ජපන් සහයෝගිතා බැංකුව මගින් 2005 වර්ෂයේදී ජපාන යෙන් මිලියන 37,817 ක සහනදායී ණය මුදලක් පිරිනමා ඇති අතර ලංකා විදුලිබල මණ්ඩලය මෙම ව්යාපෘතිය සඳහා
රුපියල් මිලියන 8548 ක මුදලක් වැය කර ඇත.
විදුලිබල මණ්ඩලයේ අධීක්ෂණය යටතේ මෙහෙයවන මෙම ව්යාපෘතියේ සියලු වැඩ නිමවා ජාතියට තිළිණ කිරීම ලබන ජූලි මස දෙවැනි සතියේ දී ජනාධිපති මහින්ද රාජපක්ෂගේ ප්රධානත්වයෙන් සිදු කිරීමට නියමිතයි.
| ← ශ්රී ලංකන් මිරර් මාධ්යවේදීන්ට පොලිස් ඇප | අතිරේක මහාමාර්ග පුනරුත්ථාපනයට පියවර → |
|---|
